స్వర్ణ గ్రామంగా తాడిపుట్టు… హుకుంపేట మండలంలో అభివృద్ధి శంఖారావం 

స్వర్ణ గ్రామంగా తాడిపుట్టు… హుకుంపేట మండలంలో అభివృద్ధి శంఖారావం 

 నూతన సచివాలయంతో గ్రామ పాలనకు వేగం – ప్రజల హర్షధ్వానాల మధ్య ప్రారంభోత్సవం - అరకు వైసీపీ ఎమ్మెల్యే రేగం మత్యలింగం 

దివ్య దర్శిని న్యూస్ హుకుంపేట, ఫిబ్రవరి 24:

అల్లూరి సీతారామరాజు జిల్లా హుకుంపేట మండలం పరిధిలోని తాడిపుట్టు గ్రామం అభివృద్ధి దిశగా మరొక కీలక ఘట్టాన్ని నమోదు చేసుకుంది. గ్రామంలో నూతనంగా నిర్మించిన స్వర్ణ గ్రామ సచివాలయ భవనాన్ని రేగం మత్స్యలింగం ఘనంగా ప్రారంభించారు. గ్రామ ప్రజల హర్షధ్వానాలు, యువత నినాదాలు, పార్టీ శ్రేణుల ఉత్సాహంతో కార్యక్రమం ఉత్సవ వాతావరణాన్ని సంతరించుకుంది.
ప్రారంభోత్సవ వేడుకకు పెద్ద సంఖ్యలో గ్రామస్థులు, మహిళలు, యువకులు హాజరై తమ ఆనందాన్ని వ్యక్తం చేశారు. సచివాలయ భవనం వద్ద సంప్రదాయ పద్ధతుల్లో పూజా కార్యక్రమాలు నిర్వహించి అనంతరం రిబ్బన్ కట్ చేసి భవనాన్ని ప్రజలకు అంకితం చేశారు.
ప్రజలకు చేరువగా పరిపాలన
స్వర్ణ గ్రామ సచివాలయం ద్వారా గ్రామ ప్రజలకు ప్రభుత్వ సేవలు మరింత సులభతరంగా అందనున్నాయి. పింఛన్లు, ఆదాయ–వసతి ధృవపత్రాలు, సంక్షేమ పథకాల దరఖాస్తులు, భూమి సంబంధిత సేవలు, ఇతర పరిపాలనా కార్యక్రమాలు ఇకపై ఒకే చోట వేగవంతంగా అందుబాటులోకి రానున్నాయి. ఆధునిక సౌకర్యాలతో నిర్మించిన ఈ భవనం గ్రామ పాలనలో పారదర్శకతకు ప్రతీకగా నిలవనుంది.
ఈ సందర్భంగా ఎమ్మెల్యే రేగం మత్స్యలింగం మాట్లాడుతూ, గ్రామాల అభివృద్ధే ప్రభుత్వ ప్రధాన లక్ష్యమని తెలిపారు. “ప్రజలే మా బలం… ప్రతి గ్రామాన్ని ఆదర్శ గ్రామంగా తీర్చిదిద్దడమే మా సంకల్పం. తాడిపుట్టును స్వర్ణ గ్రామంగా అభివృద్ధి చేసి చూపిస్తాం” అని స్పష్టం చేశారు. గ్రామీణ ప్రాంతాల్లో మౌలిక సదుపాయాల పెంపు, సంక్షేమ పథకాల సమర్థ అమలు, యువతకు అవకాశాల కల్పనపై ప్రభుత్వం దృష్టి సారించిందన్నారు.
ప్రముఖుల హాజరు
గ్రామ స్థాయి ప్రజాప్రతినిధులు, నాయకులు పాల్గొన్నారు. హుకుంపేట మండల వైసీపీ అధ్యక్షుడు పాంగి అనిల్, హుకుంపేట సర్పంచ్ సమిడా పూర్ణిమ, కొంతిలి సర్పంచ్ రేగం రమేష్, తాడిపుట్టు సర్పంచ్ సోమెలి సత్యవతి, ఎంపీటీసీ సింహాచలం, సుకూరు సర్పంచ్ దనసాని సత్యవతి తదితరులు పాల్గొన్నారు. వైసీపీ నాయకులు, కార్యకర్తలు, ఇతర ప్రజా ప్రతినిధులు కూడా హాజరై కార్యక్రమానికి మద్దతు తెలిపారు.