పాఠశాలలో కలకలం: విద్యార్థినులపై అసభ్య ప్రవర్తన—ఉపాధ్యాయుడి సస్పెన్షన్, ఎఫ్ఐఆర్ నమోదు
చిన్నారుల భద్రతకు భంగం: లైంగిక వేధింపుల ఆరోపణలతో ఉపాధ్యాయుడిపై చర్యలు
దివ్య దర్శిని న్యూస్ అల్లూరి జిల్లా/పాడేరు, ఫిబ్రవరి 07:
అల్లూరి సీతారామరాజు జిల్లా పాడేరు మండలం అయినాడ పంచాయతీ పరిధిలోని రాయిపాలెం మండల పరిషత్ ప్రాథమిక పాఠశాలలో చోటుచేసుకున్న అమానుష ఘటన జిల్లావ్యాప్తంగా తీవ్ర కలకలం రేపింది. పాఠశాలలో ఎస్.జి.టి (సెకండరీ గ్రేడ్ టీచర్)గా విధులు నిర్వహిస్తున్న పాంగి సుబ్రహ్మణ్యం విద్యార్థినుల పట్ల అసభ్యంగా ప్రవర్తిస్తూ, లైంగిక వేధింపులకు పాల్పడుతున్నాడన్న ఆరోపణల నేపథ్యంలో జిల్లా యంత్రాంగం కఠిన చర్యలకు దిగింది.
విద్యార్థినులను అనుచితంగా తాకడం, అభ్యంతరకర పదజాలంతో భయభ్రాంతులకు గురిచేయడం వంటి ఘటనలు చోటుచేసుకున్నాయని విద్యార్థుల తల్లిదండ్రులు ఉన్నతాధికారులకు ఫిర్యాదు చేశారు. ఈ ఫిర్యాదుపై స్పందించిన మండల విద్యాశాఖాధికారి ఈ నెల 5వ తేదీన ప్రాథమిక విచారణ నిర్వహించి నివేదికను సమర్పించారు.
జిల్లా కలెక్టర్ ఆదేశాల మేరకు జిల్లా విద్యాశాఖాధికారి, ఐసిడిఎస్ ప్రాజెక్ట్ డైరెక్టర్లు ఫిబ్రవరి 6వ తేదీ శుక్రవారం పాఠశాలలో క్షేత్రస్థాయి విచారణ చేపట్టారు. ఈ విచారణలో విద్యార్థులు, వారి తల్లిదండ్రులు, పాఠశాల యాజమాన్య కమిటీ సభ్యులు, సర్పంచ్తో పాటు గ్రామస్తులు హాజరయ్యారు. అందరి వాంగ్మూలాలు నమోదు చేసి, వివరమైన నివేదికను జిల్లా కలెక్టర్కు సమర్పించారు.
విచారణలో ఉపాధ్యాయుడిపై వచ్చిన ఆరోపణలు నిజమని నిర్ధారణ కావడంతో, జిల్లా కలెక్టర్ ఆదేశాల మేరకు పాంగి సుబ్రహ్మణ్యంను శనివారం (ఫిబ్రవరి 7) విధుల నుండి సస్పెండ్ చేస్తూ ఉత్తర్వులు జారీ చేశారు.
ఇదే సమయంలో నిందితుడిపై పాడేరు పోలీస్ స్టేషన్లో ఎఫ్.ఐ.ఆర్ నెం. 07/2026 నమోదు చేసినట్లు అధికారులు తెలిపారు. విద్యార్థినుల భద్రతకు భంగం కలిగించే వారిపై ఎలాంటి ఉపేక్ష ఉండదని, ఇలాంటి ఘటనలకు పాల్పడేవారిపై కఠిన చర్యలు తప్పవని జిల్లా అధికారులు స్పష్టంగా హెచ్చరించారు.
పాఠశాలలు విద్యార్థులకు సురక్షితమైన వాతావరణంగా ఉండాలన్న దిశగా ప్రభుత్వం కట్టుదిట్టమైన చర్యలు తీసుకుంటుందని ఈ సందర్భంగా అధికారులు పునరుద్ఘాటించారు.
